广东山歌（二）

刘承源

洗衫要洗石头河，一人洗衫二人磨。

邻舍问我做乜个？心肝生合无奈何。

五更鸡啼闹扬扬，老妹嘱郎心莫狂。

打开大门送郎出，转头转角要提防！

新做蓝衫莫柬蓝，新连老妹莫柬嫌。

唔蓝唔乌就耐洗，唔甜唔苦就耐行。

你要交时就来交，你莫交到半中腰！

洗衫要洗长江水，晒衫要晒长竹篙。

高岭顶上一坵田，因为无水做菜园。

今日讲倒风流事，唔知冷落二三年。

三步行来二步企，步步行来都等你。

等倒老妹无话讲，灯草织布费心机！

生春鸡嫲髻又红，贪花老妹过唔同。

贪花老妹看得出，眼角打来笑容容。

郎今出门踏石街，一皮青菜要钱买。

手捡菜秧无荡种，老妹有园借分我。

一树柑子打八箩，自从唔识打柬多。

先日无双无柬结，今年有双结柬多。

石壁种菜难生根，生疏老妹难兼身。

脚踏棉车打空纺，辗去辗转都闲情。

新做担竿五尺长，一心做来妹上冈。

问妹那路去割草，等我来寻妹商量。

上山落水下山流，菽子开花球打球。

也有一男对一女，也有红花对石榴。

新造遮子四方花，头颅唔戴手来揸。

行路唔看高低下，唔知阿哥合那侪。

新造凉帽四方花，头颅唔戴手来揸。

行路唔看高低下，唔知阿妹合那侪？

酒瓶无酒检来座，冇谷养鸡调弄我。

纸条检来做灯草，你无真心照顾我！

柑子跌落深古井，一面浮起一面沉。

你要沉时沉到底，唔要浮起弄郎心！

妹子要转转别居，莫来看东又看西。

郎今食着生理饭，无闲心事来送你。

白纸写信红纸盖，写分老妹亲手开。

百般言语写唔尽，总写老妹亲身来。

岭冈顶上一株梅，千年万载无花开。

柑子来同桔子味，唔得团圆做一堆。

门前河水浪飘飘，阿哥戒赌唔戒嫖。

讲着戒赌妹欢喜，你要戒嫖妹也恼。

先日交情笑西西，生时日月讲妹知。

今日讲着断情事，八字还在妹心里。

古井烧香暗出烟，唔知老妹乜人连？

饭甑落锅又无盖，米筛做盖气飘天。

交情就要娘欢喜，断情就要郎心甘。

你无真心同我嬲，何必当初口柬甜？

山歌唔唱心唔开，鞠酒唔得酒头来。

连妹唔得妹开口，妹子开口放心来。

岭冈顶上一丛松，松树开桠吊灯笼。

柬好灯笼要烛点，柬好阿妹要老公。

前日与妹一笼鸡，今日分做两路啼。

猪肝心肺落镬煮，两付心肝来待崖！