竹篙打水两爿开,问妹转去几时来?
三箩冇谷丢落海,唔得团圆做一堆。
睡目睡到发娘晕,地下石子话做银。
死了三日死唔去,听到娘声又返魂。
阿叔里爿妹界爿,隔山隔海唔得前。
丝线担桥唔敢过,妹系敢过郎敢连。
天上乌云锦锦青,地下阿妹样柬靓?
行路可比风吹竹,讲话可比二弦声。
阿妹生来样柬靓?红珠墨笔写唔成。
红珠墨笔写唔倒,风水厝场出妹靓。
阿妹生来样柬靓,日里转红夜转青。
日里转个桃花色,夜里转个竹叶青。
阿妹生来靓系靓,后尾梳来搭衫领。
阿叔看见心起火,生理唔做田唔耕。
豆牙好食贪你嫩,隔壁连妹贪你近。
新打厘戥头纽大,一钱想你十二分。
新打茶壶少个盖,新做鸟笼少个媒。
阿妹好比鸟媒样,隔山一召郎就来。
新做扇子七寸长,热出心头拨不凉。
岭冈顶上同妹嬲,同妹一嬲心就凉。
温水泡茶味唔清,月下纺织看唔真。
三个妹子做一下,唔知那个过长情。
深山大树赤呆呆,鹧鸪飞来石上啼。
阿妹口甜心又苦,冇谷养鸡撩弄我。
新打戒指五钱重,壁上吊紧烨烨动。
有情阿妹检去带,无情阿妹你莫动。
食烟要食黄丝烟,因为黄丝花了钱。
着痧因为肥猪肉,想思因为嫩娇连。
日头唔出天唔光,大暑唔过禾唔黄。
阿妹今年十七八,样班柬大唔连郎。
竹笋紧高节节空,唔曾约妹柬对同。
阿哥就比量天尺,老妹好比定时钟。
无火读书打暗想,无火经布打暗机。
阿妹暗机叔暗想,暗机暗想无人知。
南风唔当北风凉,亲夫唔当夜来郎。
夜来郎子有话讲,亲夫一觉到天亮。
自古食烟无带烟,自古连妹无带钱。
好田唔使高车水,好妹唔使亲郎钱。
对门阿妹系那人?日头照影看唔真。
有情阿妹面翻转,无情阿妹难转身。
落水落开六个月,屈指算来无日晴。
一心都想同妹嬲,水浸花街无路行。
满塅禾黄无我份,满村姊妹郎单身。
我有苎麻无人绩,一条草丝要求人。
百般愁郁亦有解,朱连愁郁解唔开。
胡椒劳酒来洗眼,讲着相思泪就来。
禾鹑飞去无尾鸟,来路阿哥你莫交!
来路阿哥你交倒,好比狂狗猎飞鸟。
山歌唱出闹扬扬,猪肉唔当猪粉肠。
粉肠唔当夜腊肉,腊肉唔当有情娘。
日头无火样柬暖?水里无风样柬凉?
阿妹今年十七八,身里无花样柬香?
阿妹行路假至诚,头颅低下眼割人。
阿哥唔系山老虎,唔敢落阳乱惊人。
长乐出来系兴宁,唔相唔熟柬有情。
好比半天云霞日,唔光唔暗热坏人。
日头落冈暗焦焦,阿哥转去妹心焦。
阿哥转去成双对,阿妹转去打单鸟。
脚酸难上里条冈,肚饥难过四月荒。
十八娇娘来守寡,纸船难过海中央。
黄牛过坑角嵳嵳,十八老妹懒绩麻。
讲倒绩麻心火起,讲倒风流笑脱牙。
新鲜猪肉新鲜汤,新鲜老妹新鲜郎。
新鲜老妹同郎嬲,交条人情水柬长。
想妹一年又一年,古井烧香暗出烟。
魂魄五更同妹嬲,醒眼依旧隔重天。
手拿白纸写文章,同妹交情望久长。
同妹交情望长久,当天发誓就烧香。
豆腐无油好食斋,老妹门前我踏低。
一日算来过七放,无句言语安住我。
二月燕子口衔泥,一个飞高一个低。
路上逢妹无相问,那条心事来怨我? |