《包容体谅惜老婆》 作词：客 古，清唱：廖友云

周旋

《包容体谅惜老婆》

(劝世五句板）

作词：客　古，清唱：廖友云

（山歌汇）

1

山歌一唱乐呵呵，

今日来唱惜老婆，

莫嫌老婆人唔好，

莫怪老婆俺啰嗦，

女人爱家话就多。

2

女人爱家话就多，

持家爱有多喙婆，

垃垃杂杂佢爱管，

灶头锅尾佢去摸，

还爱带好细老哥。

3

还爱带好细老哥，

十月怀胎黄脸婆，

临盆还会有水肿，

一朝为母尾拖拖，

汪汪哇哇受折磨。

4

汪汪哇哇受折磨，

油盐咸淡爱调和，

教子惜女传帮带，

旺夫兴家贡献多，

切莫亏待汝老婆。

5

切莫亏待汝老婆，

老婆为家付出多，

贫穷富贵都本份，

嫁鸡随鸡共只窝，

嫁到狗古门槛坐。

6

嫁到狗古门槛坐，

善良贤惠汝老婆，

莫去贪色心来变，

莫逞有钱贪娇娥，

莫为失败怨言多。

7

莫为失败怨言多，

前世修缘结公婆，

后生之时汝求跪，

年纪来哩嫌肚箩，

汝话俺样着啊冇？

8

汝话俺样着啊冇？

社会变化荒唐多，

一言不合婚姻变，

冇去思量冇去和，

子女心寒冷梭梭。

9

子女心寒冷梭梭，

左邻右舍是非多，

朋友亲戚另眼看，

爷娘拿汝冇奈何，

自家肚痛自家挪。

10

自家肚痛自家挪，

劝化男人莫俺傻，

夫妻恩爱家业顺，

有始有终幸福多，

包容体谅惜老婆。

客古简介

写也闲情唱闲情

客古丰顺潘田人

写写山歌乐啊子

好甭寄托客家亲

齐来传颂客文明

廖友云简介

崖系客家小儿郎

家住五华长布乡

字名友云崖姓廖

十分钟意山歌腔

客家山歌争弘扬

客家山歌争弘扬

山歌一唱乐洋洋

学唱山歌冇几久

好多腔韵盲分详

钝刀切菜望缸帮