客家情歌经典大全

　　糕子食了纸还在，你爱包回原样来，

　　先日讲个乜个话，你爱讲回原话来。

　　二月燕子口含泥，一只飞高一只低，

　　路上遇到无相问，哪条心事来怨涯？

　　初十去赴径心街，妹子遇到唔问涯，

　　手作枕头你贴过，哪条心事来怨涯？

　　行等好好来断情，样般无风会起尘？

　　苦瓜藤上打吊菜，水上摊席涯难眠。

　　咸菜入瓮屈了心，三弦唔和走了音，

　　六月老酒反了脚，无情妹子反了心。

　　当日同涯好过来，今日丢涯想唔开，

　　三斤猪肉做一料，你想拆秤拿刀来！

　　（河源）文集

　　亲亲热热两公婆，床头打交床尾和，

　　公薮鸡子有相打，心里想开事就无。

　　劝妹心头爱想开，莫来愁切做一堆，

　　阿哥好比退冬树，一到交春叶又开。

　　一下种竹望上天，谁知紧大尾紧弯，

　　一心同妹望偕老，唔奈家贫去过番。

　　阿哥出门去过番，洋船等到粤海关，

　　妹子有话当面讲，下番搭信较艰难。

　　妹送亲哥上火船，汽笛一响割心肝，

　　下番系有水客转，搭银搭信报平安。

　　汕头出海七洲洋，七日七夜水茫茫，

　　行船三日唔食饭，记妹言语当干粮。

　　（河源）文集

　　妹子爱归只管归，深山大树已伸尾，

　　砍条大树开船板，做条新船送妹归。

　　鸟子吵林日落西，三魂七魄送妹归，

　　转去家中唔使苦，系生系死哥陪你。

　　送妹送到茶亭下，放下担子来食茶，

　　嘱妹食茶爱洗碗，切莫食人口涎渣。

　　妹子爱转慢慢行，风吹芒草你莫惊，

　　深山鸟叫你莫怕，阿哥魂魄伴你行。

　　（河源）文集

　　汶水长流有日清，阿哥走后难相亲，

　　路远迢迢无处问，朝见日头夜见星。

　　阿哥走撇妹痛肠，三餐茶饭唔想尝，

　　紧食烧茶肚紧渴，紧缅亲哥夜紧长。

　　阿哥走撇妹寒酸，秤砣跌撇剩秤杆，

　　秤杆拿来挽内脏，郎就挂心妹挂肝。

　　有哥在家妹温暖，无哥在家妹寒酸，

　　三年五载无面见，床下目汁好行船。

　　河水浑浑河岸崩，亲哥走后隔重天，

　　三岁孩子脱乳咀，一觉醒来一觉跟。

　　阿哥走后妹心愁，三朝七日唔梳头，

　　听到阿哥写信转，髻尾梳到黏肩头。

　　（河源）文集

　　相思得病妹着惊，手捡灯笼星夜行；

　　双手掀开绫罗帐，问哥病情重呀轻。

　　重不重来轻不轻，难为阿妹有心行；

　　床头有张三脚凳，慢慢坐下正来谈。

　　（河源）林文达

　　送郎送到牛斗岗，郎跌脚趾受了伤，

　　扯幅罗裙包脚趾，亲哥痛肉妹痛肠。

　　送郎送到冷水窝，嘱郎冷水莫食多，

　　冷水食多肚会痛，行到半路哪人妥。

　　送郎送到上排畲，山里禾苗叶些些，

　　禾苗无水难打谷，妹子无郎难当家。

　　送郎送到大码头，满江河水向东流，

　　一对鸳鸯少一只，一只孤单水上浮。

　　送郎送到渡船头，脚踏渡船浮对浮，

　　哪有利刀能割水？哪有利刀能割愁？

　　行绣荷包两面红，一面狮子一面龙，

　　狮子上山龙下海，唔知哪日正相逢。

　　(河源)文集

　　三弦跌落大海心，好久吾曾听琴音，

　　灯草撑船来去取，害涯费了几多心。

　　高山顶上一株梅，探你唔得枉花开，

　　三箩谷壳丢落海，样得团圆做一堆。

　　一朵红花隔重墙，摘花唔到枉花香，

　　入水鹭鸶束了颈，柬好鲜鱼唔入肠。

　　新买绣鞋菊花边，去年想妹到今年，

　　百般好话都讲尽，六月火炉难近前。

　　(龙川)刘宛仁

　　买梨莫买蜂咬梨，心中有病无人知，

　　因为分离故亲切，谁知亲切转伤梨。

　　催人出门鸡乱啼，送人离别水东西，

　　挽水西流想无法，从今不养五更鸡。

　　当梨花开满山香，当梨花下送情郎，

　　莫花当梨花好看，想到当梨割断肠。

　　竹篙晒衫拉拉横，保佑阿哥走唔成，

　　保佑月历无日子，保佑水浅无船行。

　　二丈八布做耍衣，嘱郎年节爱早归，

　　燕子含泥归本薮，莫学蝴蝶满天飞。

　　阿哥出门妹莫愁，人千人万坐船头，

　　丝线拿来作衫着，钩线密粉望回头。

　　(河源）文集

　　话哩爱你就爱你，生死俩人不分离；

　　阿妹好比金戒指，阿哥日夜带稳你。

　　门前大路弯曲弯，会妹容易转就难；

　　去时情火热辣辣，转时心裂肝肠断。

　　因为想妹想到晕，唔怕名声出哩村；

　　雨水越打花越妍，真情唔怕人闲言。

　　（龙川）刘宛仁

　　行等行等无来往，猫公上圩会无行，

　　早知阿哥无情义，坐做横屋唔爱廊（郎）。

　　三月莳田满段青，六月割禾无对成，

　　早知阿哥情义短，花边贴脚涯唔行。

　　问妹唔声真真奇，哪句言语得罪你？

　　句把言语妹爱受，洗碗也有相磕时。

　　你也唔使恨啾啾，半讲半笑人人有，

　　口水吐落长江内，言语唔着照水流。

　　妹子唔使气冲冲，心中有事放从容，

　　你有情理慢慢讲，丝线牵得石牛动。

　　妹也唔使恨啾啾，洗碗相磕时时有，

　　生柴拿来做火种，涯今唔着妹莫丢。

　　阿哥落运妹莫愁，柬好棉纱有结头，

　　柬好月光有缺角，柬好草岗有瘦牛。

　　（河源）文集

　　几番上岭唔见郎，急得阿妹乱忙忙；

　　好比花针吞落肚，日刺心肝夜刺肠。

　　因为恋妹急到狂，看到山鸡当凤凰；

　　石灰当做糯米粉，叔婆伯母笑断肠！

　　想郎想到头晕晕，火烟上天作为云。

　　砻公作为雷公响，门搭作为郎打门。

　　天上乌云堆打堆，无阵大风吹唔开；

　　阿哥心头十八结，无我老妹解唔开。

　　半夜入园去摘葱，摘到蕹菜两头空，

　　半夜杀猪唔开火，上钩唔得枉人工。

　　郎系日头妹系星，你就落山涯出身，

　　日里缅你无面见，夜里缅你无兼身。

　　（河源）文集

　　黄蜂咬断丝瓜藤，无竹无架样般缠？

　　瞎子过桥丢了杖，无人牵带难行前。

　　爱银爱钱俺就矛，阿哥还系叶下桃；

　　九月重阳放纸鹞，俺今问妹高唔高。

　　饭篓唔怕沸饭汤，大船唔怕水漂江；

　　吞下秤砣铁做胆，恋你唔到心唔凉。

　　（河源）林文达

　　食饱夜饭嬲月光，看等鲤鱼透水上，

　　鲤鱼专寻涌水角，妹子专寻老实伯。

　　乌云遮月月唔明，雾里看花花唔真，

　　冷水蒸饭难上气，针筒打米难上升。

　　山歌唔唱唔风流，猪肉唔煎唔出油，

　　梧桐落叶心唔死，连妹唔到心唔休。

　　橹箕刈了心还在，五更落露生回来，

　　鹞婆入村钓鸡子，今番唔到下番来。

　　唔过重阳唔落霜，唔过霜后禾唔黄，

　　唔到黄河心唔死，唔同哥爱心唔凉！

　　连你唔到心唔灰，今生唔到下生来，

　　阿哥好比梁山伯，阿妹好比祝英台。

　　（河源）文集

　　含蕊鲜花妹清秀，低头含笑半含羞；

　　秋波传送心里话，哥哥早在妹心头。

　　好花不要天天开，好妹不要时时陪；

　　只要两侪心相印，相恋一回胜百回。

　　一对鸳鸯树上企，恩恩爱爱好甜蜜；

　　愿成鸳鸯变鸟子，伴随哥哥满天飞。

　　哥哥真的好想你，把妹画在鞋子里；

　　哥行哥走妹紧跟，恰似鸳鸯不分离。

　　（龙川）刘宛仁