七月半普渡（海陆腔）

　　 时间过还遽，一年一度七月半普渡，就在纸炮声中来结束，今年普渡因为细人仔适外庄读书，没斯转屏东去。这摆普渡续冷冷落落，斯有阿爸、吾还过夫娘三侪定定，虽然祭拜好兄弟供品摆着归桌仔，金香炮蠋也毋会少，但总係感觉少兜人气。

　　
　　 拜好兄弟係临暗仔大约六点零，天正爱断乌该下正开始拜，供品有三牲（煠熟鸡仔一个，猪肉一撩，皮蛋三个）用托盘装，水果、糖仔，汽水、硷粽二波，白砂糖一包、金香炮烛，中元普渡旗两支、用量米 阿鲁密罐仔（米笐）装米八分满做香筒插香，还过最重要係神桌面前爱放一张凳仔，凳顶爱放一面镜仔，一支梳仔，较工夫还爱放膨粉，凳下爱放一个面盆，适背爱装水大约6分满，面顶爱放一条新面帕，这係爱分好兄弟盥洗用。

　　
　　 準备好就开始点香祭拜好兄弟，将香插伫米笐肚，在过插伫供品顶，还爱留一把香，一支一支插一路插香到路口，逐条路全部爱插，这係通知好兄弟讲：吾这有準备澎派食物，请各路好兄弟前来享用。

　　
　　 主香烧一下后爱先烧经依衣分好兄弟换衫裤，经过梳洗打扮后就做得享用人间供品咧。到香烧忒剩一点仔该下做得再点一支香，好分好兄弟有较多时间享用，一直到这支香烧着剩1/3该下就爱烧金纸，烧好烧大银，续等打纸炮通知好兄弟好转咧！到这下时间头尾差毋多两点钟左右，以上係拜好兄弟经过。

　　
　　 这係伫吾公时代，吾屋下逐年全部係这样做，阿公交分阿爸（今年89岁），阿爸交分吾，过二年爱交分吾仔（佢这下读大学没转来），这就係传统，交下去就係传承。